Team MyPuneCity – शहरात गुन्हेगारी घटनांमध्ये वाढ होत असतानाच रविवारी मध्यरात्री घडलेल्या एका धक्कादायक घटनेने संपूर्ण पुणे हादरून गेले आहे. शिवसेना (शिंदे गट) युवासेनेचे पुणे जिल्हाप्रमुख नीलेश राजेंद्र घारे यांच्या कारवर वारजे माळवाडीत थेट गोळीबार (Warje Malwadi Firing) करण्यात आला. ही घटना रविवारी (१९ मे) रात्री १२ वाजण्याच्या सुमारास घडली असून, सुदैवाने या हल्ल्यात कुठलीही जीवितहानी झाली नाही.
कारवर गोळी झाडून पसार
प्राथमिक माहितीनुसार, नीलेश घारे हे वारजेतील गणपती माथा परिसरात असलेल्या जनसंपर्क कार्यालयात काही सहकाऱ्यांसोबत बैठक घेत होते. त्याचवेळी कार्यालयाबाहेर पार्क केलेल्या त्यांच्या काळ्या रंगाच्या चारचाकी वाहनावर दुचाकीवरून आलेल्या दोन अज्ञातांनी थेट गोळी (Warje Malwadi Firing) झाडली. गोळी कारच्या काचेला भिडली असून, बुलेट काच फोडून आतपर्यंत घुसली. या घटनेनंतर दोन्ही अज्ञात हल्लेखोर घटनास्थळावरून तात्काळ पसार झाले.
Chhagan Bhujbal : छगन भुजबळ पुन्हा मंत्रिमंडळात; ‘एक असा दौर येईल…’ हे शब्द ठरले खरे!
पोलिसांनी घटनास्थळी धाव घेतली
गोळीबाराची माहिती मिळताच वारजे पोलीस ठाण्याचे अधिकारी व कर्मचारी तात्काळ घटनास्थळी दाखल झाले. गुन्हा घडल्याच्या ठिकाणी पाहणी करत पोलिसांनी सीसीटीव्ही फुटेज तपासण्याचे काम सुरू केले आहे. श्वानपथक व फॉरेन्सिक पथकही घटनास्थळी दाखल झाले असून, गोळीबारासाठी वापरलेले शस्त्र कोणते होते, याचा तपास सुरू आहे.
राजकीय वर्तुळात खळबळ
शहरात एका प्रमुख राजकीय नेत्यावर थेट प्राणघातक हल्ला झाल्यामुळे राजकीय वर्तुळात मोठी खळबळ उडाली आहे. युवासेना जिल्हाप्रमुखाच्या गाडीवर झालेला गोळीबार (Warje Malwadi Firing) केवळ घारे यांच्यापुरता मर्यादित न राहता, शहरातील कायदा-सुव्यवस्थेवर गंभीर प्रश्न निर्माण करणारा आहे. निलेश घारे हे शिंदे गटातील शिवसेनेचे सक्रिय व आक्रमक युवा नेते म्हणून ओळखले जातात.
घटनेमागचं कारण अद्याप अस्पष्ट
या हल्ल्यामागचं नेमकं कारण काय आहे, हे अद्याप स्पष्ट झालेलं नाही. राजकीय रंजिश, वैयक्तिक वैर, अथवा अन्य कुठले गुन्हेगारी वर्चस्वाचे कारण यामागे आहे का, याचा तपास पोलिसांकडून सुरू आहे. वारजे पोलिसांनी या प्रकरणी गुन्हा दाखल करून अज्ञात हल्लेखोरांचा शोध सुरू केला आहे.
