Team My Pune City – महाराष्ट्र मेट्रो रेल्वे कॉर्पोरेशनच्या( Pune Metro ) (महामेट्रो) स्वारगेट ते कात्रज या ५.४६ किलोमीटर लांबीच्या भूमिगत मेट्रो मार्गिकेचे काम अदानी समूहाच्या आयटीडी सिमेंटेशन इंडिया लिमिटेड या कंपनीला मिळाले आहे. कंपनीची १,६४३.८८ कोटी रुपयांची निविदा मंजूर करण्यात आली असून, डिसेंबरअखेर प्रत्यक्ष कामाला सुरुवात होणार आहे.
केंद्र सरकारने या प्रकल्पासाठी २,९५४ कोटी रुपयांना मंजुरी ( Pune Metro ) दिली आहे. महामेट्रोकडून राबविण्यात आलेल्या निविदा प्रक्रियेत सहा कंपन्यांनी सहभाग घेतला होता. १९ सप्टेंबर रोजी उघडण्यात आलेल्या निविदांमध्ये अदानी समूहाची निविदा सर्वांत कमी किमतीची ठरली. गुणवत्ता, अनुभव आणि तांत्रिक निकषांवर पडताळणी झाल्यानंतर ही जबाबदारी कंपनीला देण्यात आली, अशी माहिती महामेट्रोचे अतिरिक्त महासंचालक (जनसंपर्क-प्रशासन) चंद्रशेखर तांबवेकर यांनी दिली.
“येत्या महिनाभरात कर्जपुरवठा आणि इतर तांत्रिक प्रक्रिया पूर्ण होणार असून, डिसेंबरअखेर प्रकल्पाचे काम सुरू केले ( Pune Metro )जाईल. २०२९ पर्यंत हा प्रकल्प पूर्ण करण्याचे उद्दिष्ट आहे,” असे तांबवेकर यांनी स्पष्ट केले.
स्थानकांची वाढ
या मार्गिकेसाठी सुरुवातीला मार्केट यार्ड, पद्मावती आणि कात्रज ही तीन स्थानके निश्चित करण्यात आली होती. जानेवारी २०२५ मध्ये निविदा मागविण्यात आल्या होत्या. मात्र, स्थानिक नागरिक आणि लोकप्रतिनिधींनी बिबवेवाडी व बालाजीनगर येथे स्थानकांची मागणी केली. उपमुख्यमंत्री अजित पवार यांनी या दोन स्थानकांना मंजुरी दिल्यानंतर महामेट्रोकडून सकारात्मक प्रतिसाद देण्यात आला आणि स्थानकांची संख्या वाढविण्यात आली. परिणामी एप्रिल २०२५ मध्ये सुधारित निविदा प्रक्रिया राबवावी लागली आणि प्रकल्पाला काहीसा विलंब ( Pune Metro ) झाला.
