Team My Pune City –प्रवाशांच्या सोयीसाठी मेट्रो फीडर बस सेवेला (PMPML)थेट विमानतळ परिसरात प्रवेश देण्याची विनंती पुणे महानगर परिवहन महामंडळ लिमिटेड (पीएमपीएमएल) ने विमानतळ प्रशासनाकडे केली आहे.
खडकीतील रहिवासी समशाद अली यांना रविवारी दिल्लीहून परत आल्यानंतर बस उपलब्ध नसल्याने जवळपास एक तास विमानतळाबाहेर थांबावे लागले. शेवटी घरी जाण्यासाठी त्यांना कॅबचे तब्बल ५७० रुपये भाडे द्यावे लागले. “जर विमानतळातूनच फीडर बस सेवा उपलब्ध असती तर मी रामवाडी मेट्रो स्टेशनपर्यंत सहज पोहोचून खडकीला कमी खर्चात पोहोचू शकलो असतो,” असे त्यांनी सांगितले.
सध्या मेट्रो प्रवाशांची संख्या वाढत असताना, पीएमपीएमएलने विमानतळ प्रशासनाला फीडर बसेसना परिसरात येऊ देण्याची परवानगी देण्याची विनंती केली आहे. पीएमपीएमएलचे अध्यक्ष व व्यवस्थापकीय संचालक पंकज देवरे यांनी सांगितले की, लवकरच या संदर्भात अधिकृत पत्र विमानतळ अधिकाऱ्यांना पाठवले जाईल.
Pune: BACARDIएक्सपिरियन्सेस प्रस्तुत CASA BACARDIऑन टूर, पुणे – सोबत आदित्य रिखारी
२६ जुलैनंतर प्रवाशांची कमतरता आणि कमी उत्पन्नामुळे रामवाडी मेट्रो स्टेशन ते विमानतळ हा थेट मार्ग बदलण्यात आला आहे. आता रेल्वे स्टेशन ते विमानतळदरम्यान सात बसेस धावत असून त्या रामवाडी मेट्रो स्टेशनलाही जोडतात. या सेवेतून ऑगस्ट महिन्यात तब्बल ५३,७८३ प्रवाशांनी प्रवास केला. तरीदेखील विमानतळ परिसरात बसला थेट प्रवेश नसल्याने अनेक प्रवासी या सुविधेचा पुरेपूर लाभ घेऊ शकत नाहीत.
नियमित प्रवासी सचिन पधारे म्हणाले, “बस मार्ग बदलल्यानंतर बसेस सहज दिसत नाहीत. विमानतळाच्या आत बसेसना परवानगी नसणे ही मोठी अडचण आहे. मेट्रो पिंपरी-चिंचवडपर्यंत विस्तारत असल्याने फीडर बसेस प्रवाशांसाठी अत्यंत उपयुक्त ठरतील.
