Team My Pune City – एका विवाहित महिलेने सासरच्या छळाला कंटाळून आत्महत्या केली. ही घटना बुधवारी (२७ ऑगस्ट) सकाळी अजमेरा पिंपरी ( Pimpri Chinchwad Crime News 28 August 2025) येथे घडली.
माधवी महेश पाटील असे आत्महत्या केलेल्या विवाहितेचे नाव आहे. या प्रकरणी माधवी यांची आई वंदना किसन जोरी (४३, नेहरुनगर, पिंपरी) यांनी संत तुकारामनगर पोलिस स्टेशनमध्ये फिर्याद दिली आहे. त्यानुसार महेश पांडुरंग पाटील (३६, अजमेरा, पिंपरी) आणि दोन महिलांच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी यांची मुलगी माधवी आणि आरोपी महेश यांचा मे २०२५ मध्ये विवाह झाला होता. विवाहानंतर अवघ्या काही दिवसात आरोपींनी माधवी यांचा छळ करण्यास सुरुवात केली. आरोपींनी व्यवसायासाठी माहेरहून पैसे आणण्यासाठी माधवी यांना वारंवार मानसिक त्रास दिला. या छळाला कंटाळून माधवी यांनी बुधवारी सकाळी साडेअकरा वाजताच्या सुमारास राहत्या घरी गळफास घेऊन आत्महत्या केली. संत तुकारामनगर पोलिस तपास करत आहेत.
Maval Crime News : टँकरमधून रॉकेल चोरी करत असताना एकाला अटक दोघे पसार
गर्दीचा फायदा घेत १५ हजारांची चोरी, दोघे अटकेत ( Pimpri Chinchwad Crime News 28 August 2025)
गणपती स्टॉलवर एका मूर्तीकाराच्या पॅन्टमधून जबरदस्तीने १५ हजार रुपये चोरले. ही घटना बुधवारी (२७ ऑगस्ट) दुपारी भोसरी ब्रिजखाली, पीएमटी बस स्टॉपशेजारी घडली.
याबाबत गौरव दत्तात्रय नलावडे (२७, ओतूर, पुणे) यांनी भोसरी पोलीस ठाण्यात फिर्याद दिली आहे. त्यानुसार बीपीएल सोलंकी गुजर (चाकण) आणि सुमित बनोस राठोड (चाकण) या दोघांना अटक केली आहे. यांच्यासह आणखी दोघांच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी गौरव नलावडे हे गणपती मूर्ती विक्रीच्या स्टॉलवर असताना, आरोपी सुमित राठोडने त्यांच्या पॅन्टच्या खिशातून १५ हजार रुपये जबरदस्तीने काढले आणि पळून जाण्याचा प्रयत्न केला. फिर्यादीने ‘चोर-चोर’ असा आवाज दिल्याने आजूबाजूच्या लोकांच्या मदतीने त्याला आणि त्याच्यासोबत असलेल्या बीपीएल गुजर याला पकडण्यात आले. भोसरी पोलिस तपास करत आहेत.
ऑनलाईन गुंतवणुकीच्या नावाखाली १५ लाखांची फसवणूक ( Pimpri Chinchwad Crime News 28 August 2025)
एका व्यक्तीची ऑनलाईन गुंतवणुकीच्या नावाखाली १५ लाख ३३ हजार रुपयांची फसवणूक झाली. ही घटना २३ नोव्हेंबर २०२४ ते ३ जानेवारी २०२५ या कालावधीत दिघी येथे ऑनलाईन माध्यमातून घडली.
या प्रकरणी संदिप सुभाष शर्मा (४९, विजयनगर, दिघी) यांनी दिघी पोलीस ठाण्यात फिर्याद दिली आहे. त्यानुसार अनोळखी व्यक्तींच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी संदिप शर्मा हे एका व्हॉट्सॲप ग्रुपमध्ये सामील झाल्यानंतर ‘आर्या आनंद’ नावाच्या महिलेने त्यांच्याशी संपर्क साधला. तिच्या सल्ल्यानुसार, शर्मा यांनी विविध बँक खात्यांमध्ये एकूण १५ लाख ३३ हजार रुपये जमा केले. सुरुवातीला त्यांना ॲपमध्ये १ कोटी २१ लाख रुपयांचा नफा दिसला. मात्र, जेव्हा त्यांनी हा नफा काढण्याचा प्रयत्न केला, तेव्हा त्यांना तो ब्लॉक झाल्याचे दिसले. आरोपीने नफा काढण्यासाठी २४ लाख २२ हजार २७९ रुपये सेवा शुल्क भरण्यास सांगितले. फिर्यादीने पैसे नसल्याचे सांगताच आरोपींनी त्यांच्याशी संपर्क करणे बंद केले. यामुळे आपली फसवणूक झाल्याचे त्यांच्या लक्षात आले. दिघी पोलीस तपास करत आहेत.
Pune: बाल गणेश कोथरूड फेस्टिव्हलला सुरुवात
तडीपार गुंडाला शस्त्रासह अटक ( Pimpri Chinchwad Crime News 28 August 2025)
पुणे जिल्ह्यातून तडीपार केलेल्या गुंडाला गुन्हे शाखेने शस्त्रासह अटक केली. गुंडाकडून दोन पिस्तूल आणि दोन काडतुसे जप्त केली. ही कारवाई बुधवारी (२७ ऑगस्ट) सायंकाळी रक्षक चौक ते पिंपळे निलखकडे जाणाऱ्या रोडवर करण्यात आली.
पवन देवेंद्र बनेटी (२४, पिंपळे गुरव) असे अटक केलेल्या आरोपीचे नाव आहे. याप्रकरणी पोलीस कॉन्स्टेबल गोविंद चव्हाण यांनी सांगवी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, रक्षक चौक ते पिंपळे निलख रस्त्यावर एकजण शस्त्र घेऊन आल्याची माहिती गुन्हे शाखा युनिट चारला मिळाली. त्यानुसार पोलिसांनी सापळा लावून पवन याला ताब्यात घेतले. त्याच्याकडून १ लाख २ हजार रुपये किमतीची दोन देशी बनावटीची पिस्तूल आणि दोन काडतुसे जप्त केली. पवन बनेटी याला पिंपरी-चिंचवड पोलिसांनी पुणे जिल्ह्यातून तडीपार केले आहे. त्याचा तडीपारीचा कालावधी संपण्यापूर्वीच तो शहरात आला.
गांजा विक्री प्रकरणी दोघांना अटक ( Pimpri Chinchwad Crime News 28 August 2025)
गांजा विक्रीसाठी आलेल्या दोघांना अमली पदार्थ विरोधी पथकाने अटक केली. ही कारवाई बुधवारी (२६ ऑगस्ट) सायंकाळी म्हाळुंगे येथे करण्यात आली.
आकाश शिवाजी मोरे (२०, सुसगाव) आणि संतकुमार जगनारायण प्रजापती (२५, सुसगाव) या आरोपींना पोलिसांनी अटक केली आहे. याप्रकरणी पोलीस कॉन्स्टेबल कपिलेश ईगवे यांनी बावधन पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, म्हाळुंगे येथे एका इंग्रजी माध्यमाच्या शाळेसमोर दोघेजण गांजा विक्रीसाठी येणार असल्याची माहिती अमली पदार्थ विरोधी पथकाला मिळाली. त्यानुसार पोलिसांनी सापळा लावून आकाश आणि संतकुमार या दोघांना अटक केली. त्यांच्याकडून ७६ हजार ५०० रुपये किमतीचा २१२ ग्रॅम गांजा जप्त केला आहे. बावधन पोलीस तपास करत आहेत.
पिंपरीतील एच. ए. मैदानावर गांजा पकडला ( Pimpri Chinchwad Crime News 28 August 2025)
पिंपरी येथील एच. ए. मैदानावर गांजा विक्रीसाठी आलेल्या एका व्यक्तीला पोलिसांनी अटक केली आहे. ही कारवाई बुधवारी (२७ ऑगस्ट) सायंकाळी करण्यात आली. मीरशाकिरजाकीर हुसेन (२८, गांधीनगर, पिंपरी) असे अटक करण्यात आलेल्या आरोपीचे नाव आहे. या प्रकरणी पोलीस कॉन्स्टेबल संतोष रजपूत यांनी संत तुकाराम नगर पोलीस ठाण्यात फिर्याद दिली आहे. हुसेन याच्याकडून २७ हजार ५०० रुपये किमतीचा ५६० ग्रॅम वजनाचा गांजा जप्त केला आहे.
