Team My Pune City -शासनाने प्रतिबंध घातलेल्या गुटख्याची साठवणूक आणि विक्री करणाऱ्या एका व्यक्तीविरोधात गुन्हा दाखल करण्यात आला आहे. ही कारवाई शनिवारी (२३ ऑगस्ट) सायंकाळी खेड तालुक्यातील निघोजे येथे करण्यात आली.
टोयाराम वोराराम चौधरी (निघोजे, खेड) असे गुन्हा दाखल झालेल्या आरोपीचे नाव आहे. याबाबत पोलीस कॉन्स्टेबल शरद खैरे यांनी महाळुंगे एमआयडीसी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपीने ग्राहकांना विक्री करण्याच्या हेतूने आपल्या खोलीत १४ हजार ८१५ रुपये किमतीचा गुटखा साठवून ठेवला होता. पोलिसांनी छापा टाकून एकूण १५४ प्रतिबंधित गुटख्याची पाकिटे जप्त केली आहेत. महाळुंगे एमआयडीसी पोलीस तपास करत आहेत.
आळंदी, बावधन, चाकण मधून तीन पिस्तूल जप्त
पिंपरी-चिंचवड पोलिसांनी आळंदी, बावधन आणि चाकण येथे तीन वेगवेगळ्या कारवाया करत तिघांना अटक केली. त्यांच्याकडून तीन पिस्तूल आणि तीन काडतुसे जप्त केली आहेत.
आळंदी येथे शनिवारी (२३ ऑगस्ट) दुपारी कारवाई करण्यात आली. यामध्ये आरोपी केतन उर्फ माया प्रकाश शिंदे (२५, आळंदी) याला अटक करण्यात आली आहे. त्याच्याकडून एक पिस्तूल आणि एक काडतूस जप्त केले आहे. याप्रकरणी पोलीस कॉन्स्टेबल स्वामी नरवडे यांनी आळंदी पोलीस ठाण्यात फिर्याद दिली आहे.
Pune: लोकमान्यनगर बचाव कृती समितीच्या सदस्यांनी घेतली माजी खासदार शिवाजी आढळराव पाटील यांची भेट
Nutan Maharashtra Engineering : आधुनिक उद्योगांवर आर्टिफिशियल इंटेलिजंसचा सकारात्मक परिणाम – डॉ. दीपक शिकारपूर
बावधन पोलीस ठाण्याच्या हद्दीतील सराईत गुन्हेगार राहुल उर्फ सोन्या प्रकाश ढगे याला अटक करण्यात आली. त्याच्याकडून एक पिस्तूल आणि एक काडतूस जप्त केले आहे. त्याला पोलिसांनी सहा महिन्यांसाठी पुणे जिल्ह्यातून तडीपार केले आहे. त्याचा तडीपारीचा कालावधी संपण्यापूर्वी तो शहरात आला. तसेच त्याने शस्त्र बाळगल्याने त्याच्यावर कारवाई करण्यात आली आहे. याप्रकरणी पोलीस कॉन्स्टेबल दत्तात्रय शिंदे यांनी बावधन पोलीस ठाण्यात फिर्याद दिली आहे.
चाकण परिसरातील नाणेकरवाडी येथून शनिवारी दुपारी सुरज समाधान कडू (१८, चाकण) याला शस्त्र बाळगल्या प्रकरणी अटक करण्यात आली. त्याच्याकडून देखील एक पिस्तूल आणि एक काडतूस जप्त करण्यात आले आहे. याप्रकरणी पोलीस कॉन्स्टेबल सुधीर दांगट यांनी चाकण पोलीस ठाण्यात फिर्याद दिली आहे.
दारुंब्रे येथे दारू भट्टीवर पोलिसांचा छापा
दारुंब्रे येथे संत तुकाराम साखर कारखान्याजवळ हातभट्टीची दारू तयार करण्यासाठी भिजत घातलेल्या भट्टीवर पोलिसांनी छापा मारून कारवाई केली. ही कारवाई शनिवारी (२३ ऑगस्ट) दुपारी करण्यात आली.
या प्रकरणात पोलीस शिपाई जाधवर यांनी शिरगाव पोलीस ठाण्यात फिर्याद दिली आहे. त्यानुसार दारुंब्रे येथील ३० वर्षीय महिलेच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपी महिलेने स्वतःच्या आर्थिक फायद्यासाठी ७७ हजार रुपये किमतीचे २२०० लिटर गुळमिश्रीत कच्चे रसायन भिजत घातले. याबाबत माहिती मिळाल्यानंतर पोलिसांनी भट्टीवर छापा मारून कारवाई केली. या कारवाई मध्ये २२०० लिटर रसायन नष्ट करण्यात आले आहे. शिरगाव पोलीस तपास करीत आहेत.
