Team MyPuneCity – पिंपरी-चिंचवड महापालिकेच्या आगामी निवडणुकीच्या (PCMC Election) तयारीस गती मिळाली असून, चारसदस्यीय प्रभागरचनेनुसार प्रभागनियोजनाचे आदेश नगरविकास विभागाकडून जारी करण्यात आले आहेत. त्यामुळे शहरात एकूण ३२ प्रभाग निश्चित करण्यात आले असून, प्रत्येक प्रभागातून चार नगरसेवकांची निवड होणार आहे. यामुळे एकूण नगरसेवकांची संख्या १२८ इतकी असेल.
२०११ च्या जनगणनेनुसार रचना
कोरोना महामारीमुळे २०२१ मधील जनगणना पुढे ढकलण्यात आल्यामुळे, प्रभागरचनेसाठी २०११ च्या जनगणनेतील १७,२९,६९२ लोकसंख्या ग्राह्य धरली जाणार आहे. सध्या शहरातील मतदारांची संख्या १४,८८,१२९ असून, नोंदणी प्रक्रिया सुरू असल्याने ही संख्या वाढण्याची शक्यता आहे.
सर्वोच्च न्यायालयाच्या आदेशामुळे निवडणुकीस गती
राज्यातील स्थानिक स्वराज्य संस्थांच्या निवडणुका (PCMC Election) चार महिन्यांत घेण्याचे आदेश सर्वोच्च न्यायालयाने दिल्यामुळे प्रशासनाने प्रभागरचनेच्या प्रक्रियेला वेग दिला आहे. याआधी एक, दोन आणि तीन सदस्यीय प्रभागांवर चर्चा झाली होती, मात्र महाविकास आघाडी सरकारने चारसदस्यीय प्रभागांची संकल्पना मान्य केली होती.
प्रभागरचना कशी केली जाणार?
प्रभागरचना करताना भूगोल, नैसर्गिक मर्यादा, रस्ते, नद्या, नाले, डोंगर, वसाहती यांचा विचार केला जाणार आहे. कोणतेही घर, चाळ वा इमारत दोन प्रभागांमध्ये विभागली जाणार नाही, याची दक्षता घेतली जाणार आहे. प्रभागांची क्रमवारी उत्तर दिशेपासून सुरू करून दक्षिणेकडे जाईल, तर सीमारेषा स्पष्टपणे रस्ते, नाले व सिटी सर्व्हे नंबरच्या आधारे दिल्या जातील.
प्रारूप तयार झाल्यानंतर काय?
प्रारूप प्रभागरचना तयार करून ती राज्य निवडणूक आयोगाच्या मान्यतेसाठी सादर केली जाईल. त्यानंतर नागरिकांकडून हरकती व सूचना मागवून त्यावर सुनावणी होईल. सुनावणीनंतर अंतिम प्रभागरचना आयोगास सादर करण्यात येईल आणि त्यानंतरच ती निवडणुकीसाठी (PCMC Election) अमलात आणली जाईल.
आयुक्तांच्या अध्यक्षतेखाली समिती गठित
या संपूर्ण प्रक्रियेसाठी आयुक्तांच्या अध्यक्षतेखाली विशेष समिती स्थापन केली जाणार असून, त्यात नगररचनाकार, संगणकतज्ज्ञ, प्रभागरचनेसंदर्भातील अधिकारी व स्थानिक स्वराज्य संस्थेच्या क्षेत्राची सखोल माहिती असलेले अधिकारी यांचा समावेश असेल.
शहरवासीयांना लवकरच प्रभागरचनेचे प्रारूप पाहता येणार असून, नागरिकांनी सजग राहून योग्य सूचना सादर कराव्यात, असे आवाहन महापालिकेकडून करण्यात आले आहे.
