Team MyPuneCity – हिंजवडीच्या मारुंजी रोडवरील अरेबियन मंडी (Arebian Mandi) हॉटेलमधील अस्वच्छतेबाबत भाजप युवा मोर्चा लीगल सेलचे पिंपरी-चिंचवड शहर सरचिटणीस प्रदीप नाईक यांनी अन्न व औषध प्रशासन विभागाकडे लेखी तक्रार दिली होती. याची बातमी My Pune City News ने दिली होती. याच बातमीचा दणका म्हणून अन्न व औषध प्रशासनाने कारवाई करत हॉटेल वर तात्पुरती बंदी आणली आहे.
याबाबत My Pune City News ने अन्न व औषध प्रशासन विभागाचे अधिकारी नारायण सरकटे यांच्याशी संपर्क साधला. यावेळी सरकटे यांनी सांगितले की, अन्न व औषध सुरक्षा विभागाकडे हॉटेल अरेबियन मंडी बाबत तक्रार दाखल झाली होती. त्या अनुषंगाने आम्ही हॉटेलला भेट दिली असता तेथे स्वच्छतेच्या बाबतीत जे नियम घातले आहेत त्याचे उल्लंघन झाल्याचे निदर्शनास आले. तसेच त्यांच्याकडे याबाबत कोणते रेकॉर्डस देखील नव्हते या पार्श्वभूमीवर हॉटेल अरेबियन मंडी वर कारवाई करण्यात आली असून त्याचा तात्पुरता परवाना रद्द करण्यात आला आहे.
नेमके काय प्रकरण आहे?
16 जुलै रोजी रात्री 8.30 च्या सुमारास प्रदीप नाईक हे अरेबियन मंडी (Arebian Mandi) हॉटेलमध्ये जेवणासाठी गेले असता, हॉटेलच्या बाहेरपासूनच भोंगळ कारभाराचा अनुभव यायला सुरूवात झाली. पार्किंगची व्यवस्था नसणे, जेवणाची जागा अस्वच्छ असणे, हात धुण्याची सोय उबगवाणी, आणि टेबल-खुर्च्यांवर तेलाचे डाग अशी चित्रं पाहायला मिळाली. त्यांनी तक्रारीत नमूद केल्याप्रमाणे, वॉशरूमपासून ते खाद्यपदार्थांपर्यंत सर्व काही दर्जाहीन व अस्वच्छ होतं, असा त्यांचा अनुभव होता.
त्यात ही त्यांनी जेवण ऑर्डर केली असता चिकन कबाब खात असताना थाळीत चक्क कोंबडीचं पिस सापडलं. हा प्रकार पाहून नाईक यांनी तात्काळ मॅनेजरला बोलावून विचारणा केली. मॅनेजरने हॉटेल (Arebian Mandi) मालकाचे नाव सांगितले, पण वाद टाळण्यासाठी “काही बोलू नका, बिल सुद्धा देऊ नका” असा सल्ला दिला. मात्र, नाईक यांनी बिलाचे पैसे स्वतः दिले असून त्यांनी ४८२ रुपये भरल्याचे स्पष्ट केले आहे.
प्रदीप नाईक यांनी या प्रकरणाबाबत तात्काळ कारवाईची मागणी केली असून, हॉटेलचा अन्न परवाना रद्द करण्यात यावा, अशी विनंती अन्न व औषध प्रशासन विभागाकडे केली आहे. त्यांनी या अस्वच्छतेमुळे आरोग्याला गंभीर धोका असल्याचे अधोरेखित करत अपायकारक अन्नामुळे रोगप्रसार होऊ शकतो आणि नागरिकांच्या जीवाशी खेळ होण्याची भीतीही व्यक्त केली.
या तक्रारीनंतर अरेबियन मंडी (Arebian Mandi) हॉटेलवर प्रशासनाने कारवाई करत पुढील गोष्टींची पूर्तता होईपर्यंत हॉटेल चा परवाना रद्द करण्यात आला आहे.
