मावळ ऑनलाईन – जांभुळफाटा, वडगाव मावळ येथे रस्ता ओलांडत असताना दुचाकीची धडक बसून एक वानर गंभीर जखमी झाल्याची घटना घडली. ही माहिती कमलेश लोखंडे आणि अभिनंदन आडसुळ (ॲम्ब्युलन्स) यांनी वन्यजीव रक्षक मावळ संस्थेचे संस्थापक निलेश गराडे यांना दिली.
माहिती मिळताच संस्थेचे सदस्य जिगर सोलंकी, दिगंबर पडवळ आणि मयुर चौधरी यांनी तात्काळ घटनास्थळी धाव घेतली. वानर झाडा-झुडुपात लपलेले होते, मात्र त्याच्या पायाला गंभीर दुखापत झाली होती.
यानंतर वन विभागाला सूचना देण्यात आली. काही वेळातच वन परिमंडळ अधिकारी एम. एस. हिरेमठ, वनरक्षक पी. कासोळे आणि एस. मोरे हे देखील घटनास्थळी पोहोचले. वन विभाग व वन्यजीव रक्षक मावळ संस्थेच्या सदस्यांनी एकत्रितपणे वानरास सुरक्षितपणे पकडून पुढील उपचारासाठी पुणे येथील भुंगाव रेस्क्यू सेंटर येथे पाठवले.
संस्थेचे अध्यक्ष अनिल आंद्रे यांनी नागरिकांना आवाहन केले की, जखमी प्राणी दिसल्यास किंवा साप लोकवस्तीत आढळल्यास त्वरित वन विभागाच्या 1926 या क्रमांकावर किंवा वन्यजीव रक्षक मावळ संस्थेच्या 9822555004 या क्रमांकावर संपर्क साधावा.
