Team My Pune City – शहरातील कोरेगाव पार्क परिसरातील( Parth Pawar Land Case) तब्बल ४० एकर जमिनीच्या गैरव्यवहार प्रकरणाने पुणे आणि राज्यातील राजकीय वर्तुळात मोठी खळबळ उडवली आहे. या घोटाळ्याची मुख्य सूत्रधार मानली जाणारी शीतल तेजवानी सध्या फरार असून, तिच्यावर दोन गुन्हे दाखल झाले आहेत. पोलिसांच्या प्राथमिक माहितीनुसार, ती देशाबाहेर पळाल्याची शक्यता व्यक्त केली जात आहे.
गुन्हा दाखल; पोलिसांचा शोध सुरू ( Parth Pawar Land Case)
सहजिल्हा निबंधक (वर्ग १) संतोष हिंगाणे यांनी दाखल केलेल्या तक्रारीनुसार, या प्रकरणात शीतल तेजवानी, अमेडिया कंपनीचे भागीदार दिग्विजय पाटील आणि सह-दुय्यम निबंधक रवींद्र तारू यांच्याविरोधात बावधन पोलिस ठाण्यात गुन्हा नोंदवण्यात आला आहे.पोलिसांनी तपास सुरू करताच शीतल तेजवानीचा मोबाईल बंद आढळला असून, ती आपल्या पती सागर सूर्यवंशीसह फरार असल्याचे समजते. पोलिसांनी तिच्या इमिग्रेशन रेकॉर्डची मागणी केली आहे.
सरकारी ताब्यातील जमीन खासगी हाती ( Parth Pawar Land Case)
ही जमीन प्रत्यक्षात बॉटनिकल सर्व्हे ऑफ इंडिया (BSI) या केंद्र सरकारच्या संस्थेच्या ताब्यात होती. शीतल तेजवानीने या जमिनीवरील हक्क मिळवण्यासाठी २७२ मूळ मालकांकडून नाममात्र रकमेवर “कधीही रद्द न होणारी पॉवर ऑफ अटर्नी” घेतली.यानंतर तिने ही जमीन अमेडिया कंपनीला विकली. या कंपनीत पार्थ पवार यांची ९९ टक्के, तर सुनेत्रा पवार यांच्या भाचे दिग्विजय पाटील यांची १ टक्के भागीदारी असल्याचे दस्तऐवजांमधून समोर आले आहे.
घोटाळ्यांचा इतिहास आणि कर्जाचा डोंगर ( Parth Pawar Land Case)
शीतल तेजवानीचा घोटाळ्यांचा इतिहास जुना असल्याचे पोलिसांनी सांगितले. तिचा पती सागर सूर्यवंशी हा सेवा विकास सहकारी बँकेच्या गैरव्यवहार प्रकरणातील आरोपी असून, दोघांवर मिळून १०० कोटी रुपयांहून अधिक कर्ज बाकी असल्याचे समोर आले आहे.तिने पुण्यातील कोरेगाव पार्कमधील जमीन व्यवहार पूर्वनियोजित योजनेने आणि फसवणुकीच्या हेतूने रचल्याचा आरोप आहे. अमेडिया कंपनीतील पार्थ पवार आणि दिग्विजय पाटील यांच्या भागीदारीबद्दल माहिती मिळाल्यानंतर तिने स्वतःच्या फायद्यासाठी व्यवहाराची आखणी केली, असा संशय तपास यंत्रणांनी व्यक्त केला आहे.
तपासाचा वेग वाढवला; राजकीय वर्तुळात खळबळ ( Parth Pawar Land Case)
शीतल तेजवानी आणि तिच्या पतीचा ठावठिकाणा लागलेला नसल्याने पोलिसांनी विशेष पथक तयार करून तपासाचा वेग वाढवला आहे. तिच्या परदेश प्रवासाबाबतची खात्री करण्यासाठी इमिग्रेशन विभागाशी संपर्क साधण्यात आला आहे.या प्रकरणात पार्थ पवार यांच्या कंपनीचा उल्लेख आल्याने राजकीय तापमान वाढले आहे. विरोधकांकडून या व्यवहाराची सखोल चौकशी आणि आरोपींवर तत्काळ कारवाई करण्याची मागणी होत आहे.
या घोटाळ्याने राजकारण, प्रशासन आणि आर्थिक व्यवहार यांच्यातील संबंधांवर प्रश्नचिन्ह निर्माण केले आहे. पोलिस तपासातील पुढील उघडकीमुळे केवळ या प्रकरणाचाच नव्हे, तर पुण्यातील इतर वादग्रस्त जमिनींचा मागोवा घेण्याचा मार्ग खुला होणार आहे. या प्रकरणाचा निकाल काय लागतो आणि शीतल तेजवानीचा ठावठिकाणा कधी लागतो, याकडे आता संपूर्ण राज्याचे लक्ष केंद्रीत झाले आहे.( Parth Pawar Land Case)
